पोखरा महानगरपालिका वडा नं. २६ का वडाध्यक्ष नरेन्द्र थापा बेलायतको लण्डन शहरको दक्षिण पूर्वी भेगमा रहेको स्थानीय निकाय बरो अफ लेविसम काउन्सीलका मेयरबाट सम्मानित भएका छन् ।
एभरेष्ट इन समूहको सहकार्यमा सामाजिक एवं सामुदायिक हितका लागि कार्य गरेवापत अध्यक्ष थापालाई मेयर ताउसेफ अनवरले लेविसम काउन्सीलमा सम्मान गरेका हुन ।
बेलायत भ्रमणमा रहेका थापालाई सम्मान गर्दै, मेयर एवं काउन्सीलका प्रवक्तासमेत रहेका अनवरले आफ्नो नगर र पोखरा महानगरबीच मित्रताका लागि चाँडै नै संझौता हुने विश्वास व्यक्त गरे ।
उनले लेविसम नगरका तर्फबाट पोखरेली जनतालाई मित्रता र सद्भावको सन्देशसमेत दिएका छन् । वडाध्यक्षले थापाले पोखरा भ्रमणका लागि दिएको निमन्त्रणा स्वीकार गर्दै, मेयर अनवरले त्यसलाई सहकार्यको अवसरका रुपमा प्रयोग गर्ने बताए ।
वडाध्यक्ष थापाले यसअघि लण्डन सर्दक काउन्सीलका मेयर सुनिल चोप्राले पनि रोयल ट्रेकको भ्रमण गरेको जानकारी गराउँदा, मेयर अनवरले चोप्रा र आफूबीच पनि घनिष्ट सम्बध रहेको बताएका थिए । त्यस अवसरमा मेयर अनबरले काउन्सीलको बैठक प्रक्रियाका विषयमा जानकारी गराएका थिए ।
