बागलुङ
बागलुङमा मंगलबार भव्य कार्यक्रमसहित उद्घाटन भएको बसपार्क २४ घण्टा नबित्दै सुनसान भएको छ। व्यवसायीहरूले सवारीसाधन बसपार्कमा लैजान अस्वीकार गरेपछि यस्तो अवस्था सिर्जना भएको हो। उनीहरू बाटोको खराब अवस्थालाई र सवारीसाधनको सुरक्षालाई प्रमुख चुनौतीका रूपमा देखाएका छन्।
गण्डकी प्रदेशका मुख्यमन्त्री सुरेन्द्र पाण्डेले चालक र सहचालकलाई टीका लगाउँदै बसपार्कको औपचारिक शुभारम्भ गरेका थिए। बागलुङ नगरपालिका–४ दावगह्मामा अवस्थित यो आधुनिक बसपार्क २३ वर्षको प्रतीक्षापछि सञ्चालनमा आएको हो।
व्यवसायी विष्णुराज पन्तका अनुसार सुरक्षाको अभावका कारण सवारी साधनहरू बसपार्कमा राख्न नसकिएको हो। यससँगै, नगरपालिकाले व्यवसायीसँग सम्झौता गर्ने प्रक्रिया अझै पूरा गर्न बाँकी रहेको जानकारी दिएको छ। उनीहरूले यातायात व्यवसायीसँग लिखित सम्झौतामा हस्ताक्षर गरेर मात्र बसपार्कलाई दीगो बनाउन चाहेको बताएका छन्।
यो बसपार्क निर्माण गर्न नगर विकास कोषबाट रु. आठ करोड ७० लाख ऋण लिइएको थियो। बसपार्कमा एकैसाथ ८० ठूला बस र १० माइक्रोबस अटाउन सकिने सुविधा रहेको छ।
