“मनसुनको सिर्जनशील वर्षा: हितमान गुरुङलाई सिर्जनशील युवा कला पुरस्कार २०८१”

पोखरा

लम्जुङ्का सिर्जनशील युवा कलाकार हितमान गुरुङलाई यस वर्षको सिर्जनशील युवा कला पुरस्कार २०८१ बाट सम्मानित गरिएको छ। पोखरामा आयोजित चौथो संस्करणको “मन्सुन सामूहिक चित्रकला प्रदर्शनी” को समापन समारोहमा गुरुङलाई यो प्रतिष्ठित पुरस्कार प्रदान गरियो।

यस पुरस्कारलाई दिवंगत सिद्धिरत्न शाक्य र सेतुलिमाया शाक्यको स्मृतिमा सुपुत्र श्री विश्वरत्न शाक्य र परिवारद्वारा स्थापना गरिएको छ, र सिर्जनशील कलाकार समूह, पोखरा, द्वारा प्रत्येक वर्ष प्रदान गरिन्छ।

कार्यक्रमको मुख्य आकर्षण गुरुङको सम्मान मात्र नभई, उहाँको योगदान र सिर्जनशीलतामा समर्पित रहेको थियो। गुरुङले आफ्नो सम्मानप्रति कृतज्ञता व्यक्त गर्दै भन्नुभयो, “यस सम्मानले मलाई अझ प्रेरित बनाएको छ। म सबैलाई हार्दिक धन्यवाद दिन चाहन्छु।”

प्राज्ञ तथा साहित्यकार सरुभक्त ले कार्यक्रममा गुरुङको कलाको प्रशंसा गर्दै कलाकारहरूको हकहितको विषयमा आफ्नो धारणा राख्नुभयो।

उहाँले भन्नुभयो, “हितमान गुरुङ जस्ता कलाकारले समकालीन नेपाली कला जगतलाई अन्तर्राष्ट्रिय स्तरमा चिनाउन ठूलो योगदान दिएका छन्। नयाँ पुस्ताका कलाकारहरूलाई उहाँबाट धेरै कुरा सिक्नुपर्नेछ। उहाँको सिर्जना केवल दृश्यात्मक मात्र नभएर, त्यो सन्देशको दृष्टिकोणबाट पनि गहिरो छ।”सरुभक्तले थप स्पष्ट पार्दै भने, “कलाकारहरूको हकहित सुनिश्चित गर्नु हाम्रो दायित्व हो। कलामा प्राविधिक ज्ञान मात्रै महत्त्वपूर्ण छैन, यसमा आत्माको गहिराइ चाहिन्छ। पोखरामा नै बसेर पनि विश्वस्तरीय सिर्जना गर्न सकिन्छ, त्यसका लागि मन र आत्माको सम्पर्क कलामा हुनुपर्छ।”नयाँ भाइबहिनीहरूलाई सुझाव स्वरूप उहाँले चित्रकलालाई साहित्यमा पनि जानकारी लिन अनुरोध गर्नुभयो। साथै, चित्रकला सिर्जना गर्नका लागि विश्वविद्यालयमा गएर मात्र पढ्नुपर्ने हैन , पोखरामा बसेर पनि सिर्जना गर्न सकिने कुरा उल्लेख गर्नुभयो।पोखरा आफैमा कलाको बिश्वबिद्यालय रहेको जिकिर गर्नुभयो , साहित्य र चित्रकला भित्रको ज्ञानले मात्र प्राप्त हुन्छ, हिमाल र घाँसे चउरहरू र खरका घरहरु मात्र बनाएर होइन, आफ्नो अन्तर्मनबाट सिर्जना गर्न सक्नुभयो भने अझ राम्रो हुन्छ भन्ने सुझाव दिनुभयो।

उहाँले नयाँ कलाकारहरूलाई चित्रकलामा प्रबिधिको जानकारी लिँदै सिर्जना गर्न अनुरोध गर्नुभयो। उहाँको सुझाव थियो कि सिर्जना विश्वविद्यालयमा मात्र सिक्नुपर्ने कुरा होइन, पोखरामा बसेर पनि उत्कृष्ट रचना गर्न सकिन्छ। सिर्जना गर्न आन्तरिक प्रेरणा महत्त्वपूर्ण हुन्छ भन्ने कुरालाई उहाँले जोड दिनुभयो।

कार्यक्रममा वरिष्ठ कलाकारहरूको बाक्लो उपस्थिति रहेको थियो। कार्यक्रमका संरक्षक छेत्र लाल कायस्थ र लोक प्रसाद गुरुङले कलाकारहरूको हकहितबारे विशेष चर्चा गर्नुभयो। समूहका अध्यक्ष दल बहादुर गुरुङले “मन्सुन” चित्रकला प्रदर्शनीको सफलताप्रति सबै कलाकारलाई धन्यवाद व्यक्त गर्नुभयो।

कार्यक्रमको समापनमा उपस्थित विशिष्ट अतिथिहरूले समेत गुरुङको कलालाई नेपाली समाजको प्रतिबिम्बको रूपमा प्रस्तुत गर्दै उहाँको कामको प्रशंसा गरे।

सबै कला प्रेमीहरूलाई स्वतन्त्र रूपमा प्रदर्शनी अवलोकन गर्नका लागि आमन्त्रण गरिएको ‘मनसून चौथो सामुहिक कला प्रदर्शनी’ असोज ३ गतेबाट सुरुभई १७ गते समापन भएको हो ।

जसमा सहभागी कलाकार हरु प्रकाश अधिकारी,आकाश गुरुङ,अमृत परियार,बाबुराम बस्ताकोटी,बामन चालिसे,बिश्व केसी,बिश्व रत्न शाक्य,बिश्वराज पराजुली,बुद्धि गुरुङ,छेत्र लाल कायस्थ,डीबी गुरुङ,देवेंद्र गुरुङ,दुर्गा केसी,गोपाल दराई,गोपाल श्रेष्ठ,हरेराम जोजेजू,झविन्द्र गुरुङ,जित गुरुङ,ज्योति गुरुङ,केशर गुरुङ,लोकप्रसाद गुरुङ ,मदन बान्तावा राई ,मिलन शेरचन,निशान थापा,पदम घले,पारु अधिकारी,रमेश श्रेष्ठ,रिक गुरुङ ,एस कुमार श्रेष्ठ,सञ्जय गुरुङ,सञ्जिता घिमिरे बी.के.,सरोज कायस्थ,सौगात गुरुङ,शिव शिरपाली,सुदिन श्रेष्ठ, सुरेन्द्र राज अधिकारी,थमन,सिंह सुनार,उज्वल अधिकारी,युवराज लामिछाने,अलिता गुरुङ,डा. निर्मल लामिछाने , नागेन सिंह,कृपा श्रेष्ठ,हेमकान्ती गुरुङ र मनोज गुरुङ बिकाश श्रेष्ठ रहेका छन्।

सिर्जनशील युवा कला पुरस्कार २०८१ ले हितमान गुरुङको योगदानलाई मात्र उजागर गरेन, यसले नेपाली कलाको भविष्यलाई अझ उज्यालो बनाउने प्रेरणा दिएको छ।